Извештај од мониторинг посета на Јавна установа Детски дом „11 Октомври“ – Скопје

Овој извештај беше изработен во рамки на проектот „Зајакнување на човековите права и услуги за децата и ранливите лица во ризик во затворени институции“. Главна цел на проектот е да придонесе кон подобрување на
услугите за целните групи преку пристап заснован врз човекови права. Специфичните цели се насочени кон
подобрување на условите и кон заштита на човековите права, зајакнување на капацитетите на персоналот и
поттикнување соработка меѓу локалните активисти, институциите и заедницата.

Во рамки на активностите за мониторинг и посета беше извршена посета на Јавната установа за згрижување деца
без родители и без родителска грижа „11 Октомври“ – Скопје, со посебен фокус на станбените единици Карпош,
Капиштец и Козле. Посетите беа остварени на 26.02.2026 и на 27.02.2026 година.

Мониторингот беше спроведен од тим составен од претставници на Хелсиншкиот комитет за човекови права,
кои остварија непосреден увид во условите за живот на децата, организацијата на секојдневното функционирање
на станбените единици, односот меѓу децата и вработените, како и пристапот до образование, здравствена заштита, психолошка поддршка и воннаставни активности.

За време на посетата беа остварени разговори со децата сместени во станбените единици, со воспитувачите, негувателите и останатиот стручен кадар, со цел да се добие реална и сеопфатна слика за функционирањето на
системот на згрижување и за секојдневните предизвици со кои се соочуваат и децата и вработените.