Промовирана платформата за следење на фемициди

Во рамките на денешните активности по повод Меѓународниот ден за елиминирање на насилството врз жените, Мисијата на ОБСЕ во Скопје го промовира новиот механизам — Платформа за следење на фемицидите („Femicide Watch“), како дел од кампањата „16 дена активизам против родово базирано насилство“.

На настанот се обрати амбасадорот Килиан Вил, шеф на мисијата на ОБСЕ во Скопје, претседателката Гордана Силјановска Давкова, претставници од Владата, судии и обвинители и претставници на надлежни институции и граѓански организации.

Меѓу другите говорници, се обрати и Уранија Пировска, извршна директорка на Хелсиншкиот комитет за човекови права, која ја истакна виталната улога на оваа Платформа. Таа подвлече дека со воспоставувањето на стандарди за собирање податоци, меѓусекторска соработка и отчетност, можеме значително да ги зајакнеме институционалните капацитети за превенција и реакција на фемицид.

Пировска нагласи дека има сериозни пропусти кога жртвите често претходно пријавувале насилство, но институциите не преземале соодветни мерки за заштита.

Со поддршка од Мисијата на ОБСЕ, Платформата „Femicide Watch“ е прва ваква платформа во земјата и ќе служи како клучна алатка за собирање податоци, изработка на анализа и креирање политики за превенција.