април 15, 2020

Освен право на религија, граѓаните имаат и право на здравје

Реакција на Мрежата за заштита од дискриминација по изјавата на премиерот дека Владата не може да затвора верски објекти

Привилегиите за верските заедници претставуваат дискриминација, повреда на правото на еднаквост на граѓаните и загрозување на јавното здравје! Влада на Република Северна Македонија треба да ја ограничи слободата на манифестирање религија, како дел од слободата на религија која и според Европскиот Суд за човекови права / European Court Of Human Rights (ECHR) е предмет на ограничување поради заштита на јавното здравје, согласно принципот на пропорционалност. Слободата да манифестираш религија го опфаќа и прославувањето на религиски празници во верски објекти. За разлика од слободата да ја манифестираш религијата, правото да веруваш и правото да ја промениш религијата се апсолутни и не можат да бидат предмет на ограничувања.

Освен право на религија, граѓаните имаат и право на здравје. Во услови на глобална пандемија одговорно и разумно решение е да се даде предност на здравјето. Исто како што делумно се жртвуваат правото на образование, слободата на движење, правото на приватност и други права, и слободата на религија мора делумно да се ограничи во интерес на јавното здравје!