СОСТОЈБАТА СО ЧОВЕКОВИТЕ ПРАВА – МЕСЕЧЕН ИЗВЕШТАЈ ЗА ФЕВРУАРИ 2025

Содржина:

1. Вовед
2. Говор на омраза
3. Дела од омраза
4. Родово базирано насилство и семејно насилство
5. Затворени институции
6. Бесплатна правна помош

Во февруари 2025 година, во јавноста се отворија прашања што се однесуваат на областа на човековите права.
Националната мрежа против насилство врз жени и семејно насилство, Платформата за родова еднаквост и Мрежата за заштита од дискриминација изразија сериозна загриженост поради предложените измени на Законот за полиција. Овие измени се чекор назад
во заштитата на жртвите на родово базирано и семејно насилство и се косат со Истанбулската конвенција и со домашното законодавство.

Клучните промени предвидуваа одземање на службеното оружје од полициски службеник само по спроведена внатрешна постапка во МВР, наместо веднаш по известување за насилство, и укинување на обврската за задолжителен психолошки и психијатриски преглед на службеници обвинети за насилство.

Овие измени сериозно ја загрозуваат безбедноста на жртвите, особено кога сторителот е припадник на полицијата. Како резултат на реакциите од граѓанскиот сектор, измените беа повлечени од страна на Владата и Министерството за внатрешни работи.

Дополнително, во текот на месецот, Платформата за родова еднаквост реагираше на засилени случаи на мизогинија и родово базиран говор на омраза во јавната сфера, насочени кон новинарки и политичарки.
Нападите доаѓаа од јавни личности – новинари и функционери – што дополнително ги зголеми нивното влијание и штетност.

Овие случувања укажуваат на загрижувачки тренд на враќање кон патријархални и репресивни модели што ги поткопуваат родовата еднаквост и човековите права. Се бараат јасна институционална реакција, санкционирање на говорот на омраза и посилна
поддршка на жените во јавната сфера.