Извештај од мониторинг посета Јавна установа Специјален завод Демир Капија

Овој извештај беше изработен во рамки на проектот „Зајакнување на човековите права и услуги за децата и
ранливите лица во ризик во затворени институции“. Главна цел на проектот е да придонесе кон подобрување на
услугите за целните групи преку пристап заснован врз човекови права. Специфичните цели се насочени кон подобрување на условите и кон заштита на човековите права, зајакнување на капацитетите на персоналот и
поттикнување соработка меѓу локалните активисти, институции и заедницата. Во рамките на првиот дел од активностите во проектот – мониторинг и посета – беше извршена посета на Специјалниот завод во Демир Капија и на станбените единици.

За време на посетата беа остварени разговори со персоналот на установата, вклучително со в. д. директорката, која е истовремено и специјален едукатор, две социјални работнички, три координаторки на организациските единици, две медицински сестри, една лаборантка и повеќе од дванаесет негуватели/ки.

Посетата беше спроведена врз основа на претходно изготвена методологија, а целта на мониторингот беше да
се добие сеопфатна слика за тековните услови за живеење, здравствената грижа, кадровскиот капацитет, организациските практики и степенот на примена на процесот на деинституционализација во установата, со цел
изработка на препораки за унапредување на квалитетот на услугите и за заштита на правата на корисниците.