Тркалезна маса за тековните трендови на миграција и барателите на азил во Република Македонија

Tимот на Хелсиншкиот комитет за човекови права на Република Македонија, денеска организираше тркалезна маса во Гевгелија на тема „Тековните трендови на миграција и баратели на азил во Република Македонија“ во рамки на проектот „Помош на рутата – обезбедување поголема заштита на правата на бегалците, мигрантите и барателите на азил во Република Македонија и Србија“ финансиран од инструментот за заштита на човековите права (ЕИДХР) на Европската Унија.

Дискусијата на овој настан се фокусираше на научените лекции со справувањето со бегалската криза и миграциските текови во Република Македонија во 2017 и 2018 година, како и тековните светски трендови. Во момент кога земјата се подготвува за отпочнување на преговорите во рамки на Поглавјето 24 – Правда, слобода и безбедност и со трендот на зголемување на миграциските текови, говорниците дискутираа за подготвеноста на надлежните институции стратешки да му пристапат на ова прашање на локално и државно ниво. Посебен акцент се стави на понатамошно зајакнување на капацитетите на локалните власти, граничната полиција, Центарот за управување со кризи и локалните граѓански организации за успешно менаџирање со сите наредни предизвици со кои земјата треба да се соочи. Останува потребата од дополнително зајакнување на соработката помеѓу сите заинтересирани страни на локално и централно ниво и граѓанските организации во Република Македонија, но и нејзино проширување со организации од грчка страна. Со цел да се обезбеди стратешки и сеопфатен пристап, говорниците препорачаа дека постои потреба од јакнење на човечките и техничките капацитети на сите служби на локално ниво и обезбедување на сретства од страна на државниот буџет за реализација на сите тековни акциски планови за обезбедување на интегриран и хуман третман со мигрантите кои транзитираат низ територијата на Република Македонија, согласно сите ЕУ и меѓународни стандарди за заштита на човековите права.

На тркалезната маса покрај грантистите на овој проект (Граѓански развој – Куманово, Црвен крст – Македонија, Отворена порта, Легис и РЦОР – Гевгелија) свое учество и придонес имаа градоначалникот на Општина Гевгелија, Сашо Поцков, Миле Ангелков – Полициска станица Гевгелија, Мирјана Костадинова од Локалната комисија за борба против трговија со луѓе и илегална миграција и Зоран Лазаровски од Центарот за управување со кризи – Гевгелија.

Дијалогот на оваа тема ќе продолжи во текот на ноември, и ќе се заокружи со завршниот настан  во Скопје на 27 ноември 2018 година.