Хелсиншки: Долгите чекања за посвојување деца се должат на лошите процедури
Случајот со двојката која веќе три години чека дозвола од Министерството да посвои дете, за што вчера информираше телевизијата Алсат, не е единствен случај. Со долги чекања се соочуваат и други парови кои се пријавиле за посвојување деца. Една двојка дури одлучи да побара помош од Хелсиншкиот комитет. Наташа Петковска, од Хелсиншкиот комитет, вели дека Правилникот со кој се утврдува постапката што треба да се следи за посвојување дете не е променет од 2012 година.
Министерството за труд и социјална политика не ни даде одговор за тоа кој е најдолгиот временски период кога една двојка чекала откако ќе биде ставена во Регистарот на посвојувања. Според нив, постапките за посвојување варираат и зависат од условите и критериумите што ги исполнуваат родителите – посвоители.
„Во врска со прашањето зошто паровите чекаат три години за посвојување и покрај исполнувањето на условите, ве известуваме дека во моментов во регистарот на потенцијални посвојувачи се регистрирани 284 двојки, од кои 195 се државјани на Република Северна Македонија и сите овие двојки ги исполнуваат условите за посвојување дете“, наведуваат од Министерството за труд и социјална политика.
Следната недела претставници на Хелсиншкиот комитет ќе се сретнат со министерката за труд и социјална политика, Јагода Шахпаска, за да разговараат за овие случаи и за недостатоците во постапката на посвојување и самиот Закон за семејство. Во текот на 2020 година биле посвоени 17 деца, во 2019, 47, а во 2018 година 20 деца. Според Законот за семејство, може да се посвојуваат само малолетни деца не помлади од три месеци.