Скопска парада на гордоста 2024: Спектакуларно непослушни!

За да можеме да бидеме свои, автентични и истовремено безбедни – и дома и надвор. Протестот е барање за институциите на системот да гарантираат безбеден живот и да ги штитат нашите човекови права и слободи.

За да можеме подеднакво да учествуваме во општествениот и политичкиот живот без дискриминација и исклучување. Протестот е барање за институциите на системот да гарантираат еднакви можности, недискриминација и социјално вклучување на сите луѓе без разлика на нашата сексуална ориентација или родов идентитет.

За да можеме да се школуваме во образовен систем кој учи на прифаќање на разликите и промовира социјална кохезија наместо исклучување. Протестот е барање за Владата да обезбеди образовен систем, курикулуми и програми кој ќе ги градат светогледите на идните генерации засновани на демократски вредности, солидарност, емпатија и грижа.

За да можеме да имаме лични документи кои ќе го изразуваат нашиот род. Протестот е барање до Собранието да го усвои законот за матична евиденција со вклучен модел за правно признавање на родот заснован на самоопределување.

За да можеме подеднакво да имаме пристап до здравствени услуги и уживаме квалитетен живот и здравје. Протестот е барање за здравствениот систем да се прилагоди кон потребите на различните групи граѓани и со тоа да биде вклучувачки и недискриминаторски.

На учесниците на Парадата им се обрати мајка на трансродова тинејџерка. Таа им порача на сите родители чии деца не се цис хетеро, да ги прифатат какви што се и да бидат горди на нив, наспроти општествените правила кои често налагаат да се срамат и да ги отфрлаат.

„Родители, додека општествените правила ви налагаат да се срамите и да ги отфрлате вашите деца, бидете спектакуларно непослушни, прифатете ги какви што се и бидете горди на нив. Кога ќерка ми се охрабри да каже дека е трансродова, го срушивме најдебелиот ѕид меѓу нас што ме попречуваше да ја запознаам целосно и вистински. Претходно предолго гледав како моето весело дете се претвора во исплашена и повлечена тинејџерка. Нејзиното „излегување од шкафот“ го дочекав со радост и големо олеснување што, пак, помогна веднаш да исчезнат сите нејзини грижи и стравови и да ми се врати детето кое го знаев отсекогаш. Родители, додека општествените правила ви налагаат да се срамите и да ги отфрлате вашите деца, бидете спектакуларно непослушни и прифатете ги какви што се и бидете горди на нив“.

Таа рече и дека е многу среќна што во време кога хомофобијата и трансфобијата дивеат, ЛГБТ заедницата покажува дека нема да се повлече во четири ѕида.

-По петти пат храбро покажуваме дека припаѓаме во овој свет, по петти пат ги славиме нашите животи кои и тоа како се вредни да ги живееме. Многу тинејџери живеат во страв од своите родители и се соочуваат со отфрлање, слушаат од своите соученици и професори дека не се вредни да постојат и дека не треба да ги има. Драги деца, не е во ред да живеете во страв и изолација додека вашите цис хетеро врсници го живеат тинејџерството до максимум. Не е фер од вас да се бара неизмерна сила и храброст само за да живеете и преживеете во вашите семејства. Знајте дека без разлика што зборуваат возрасните околу вас, вашите идентитети се вистински и валидни. Кога родителите одбиваат да ве прифатат, сакам да знаете дека тоа не е ваша вина, вашето постоење е бесценето и ја заслужувате целата љубов и поддршка на светот. Во најтешките моменти, кога се чувствувате најосамено и кога боли до врескање, сакам да знаете дека не сте сами, дека постои една цела заедница која е тука да ве поддржи, истакна мајката на трансродовата тинејџерка.

На учесниците им се обрати и Рита Бехадини, активискта и феминистка.

Поддршка на годинешниот „Скопје Прајд“ дадоа Агенцијата на САД за меѓународен развој  – УСАИД,  Совет на Европа, Делегацијата на Европска Унија во Република Северна Македонија, Стокхолм Прајд, Амбасадата на Франција во Македонија, Кин енд Карта – Северна Македонија, Брејнстер за изработката на визуелниот идентитет, а особено нивниот студент Имер Салиу и Министерството за одбрана на РСМ.

Видео: Сител