СОСТОЈБАТА СО ЧОВЕКОВИТЕ ПРАВА – МЕСЕЧЕН ИЗВЕШТАЈ ЗА НОЕМВРИ 2025

Ноември го одбележа објавувањето на Извештајот на Европската комисија за напредокот на Република Северна Македонија, кој нотира сериозни назадувања во областите на недискриминацијата, родовата еднаквост и независноста на судството. Хелсиншкиот комитет, заедно со граѓанскиот сектор, изрази длабока загриженост за институционалната немарност и корупција, особено по трагедијата во дискотеката „Пулс“ во Кочани, како и за контроверзните измени на законите за образование кои директно ги нарушуваат европските вредности и правата на младите. Во овој период беше регистриран загрижувачки тренд на ескалација на говорот на омраза, со 88 пријавени случаи, при што етничката и националната припадност, како и родовата и сексуалната ориентација, се најчести мотиви. Етнизацијата на изборниот исход во Кичево дополнително ги поттикна тензиите, а социјалните мрежи одиграа клучна улога во брзото ширење на манипулативни содржини и непроверени тврдења, што ја нормализираше омразата. Дополнително, беше регистриран еден инцидент на фудбалски натпревар со етнички мотив. И покрај овие предизвици, Хелсиншкиот комитет продолжи со активности за подобрување на условите во затворените институции, вклучително и преку музичка работилница во ВПД Тетово и опремување на женскиот оддел, и преку мониторинг на судскиот процес за трагедијата во Кочани, повикувајќи на јавна, правична и непристрасна постапка.